Chaussa da famiglia

Fritgus sto el esser, mineral sco la plattamorta ed in pau feminin, il vin grischun da la Spagna. Da quell’opiniun èn ils dus frars Aron e Martin Candrian da Sagogn che han cumprà avant diesch onns in bain da vignas en il Prioriat spagnol (regiun da vin). «Ina but senza funs» è l’opiniun da la mamma, ed il bab agiunta: «In plazzal! Nus n’avain cumprà nagut auter che lavur». Ma cun la voluntad da tegnair la dira, ina detga purziun stinadadad grischuna ed il spiert da cuminanza da la famiglia è il manaschi «Mas Cantrio» – suenter diesch onns lavur – sa sviluppà ad in bain da viticultura renconuschì en il Priorat. Il film da Manfred Ferrari raquinta l’istorgia dal project ch’ha cumenzà cun l’idea fixa d’ina persuna, ch’è dentant vegnì realisà mo grazia a la stretga collavuraziun en famiglia e cun la populaziun da la regiun. Questa «chaussa da famiglia» è il medem mument in confess da sa restrenscher e da dar dapli impurtanza a la qualitad ed a l’atgna lavur manuala che a la grondezza ed al gudogn.