La vatga grischuna

La vatga è la bestga preferida en Svizra. Tgenina vatga, quai è lura in'autra dumonda. La Brina era en il Grischun fin ils onns 1960 la vatga unitara. Oz è quai auter. A partir dal 1967 ins ha cruschà las Brinas originalas cun las Brinas americanas per savair producir dapli latg. Enstagl da 3500 enfin 4000 kilos latg per onn dattan las Brown-Swiss duas giadas tant latg. La surproducziun da latg era preprogrammada. Sin la tschertga dad alternativas a las muntognas da paintg ins ha cumenzà a metter en stalla era muvel ester. Sco l'expert dal Plantahof Mario Bühler constatescha oz, na datti dentant nagina vatga ideala per il Grischun, ina vatga ideala datti mo per in singul manaschi. Era l'anteriur schef da l'Uffizi d'agricultura Alexander Dönz di autocritic che da propagar en il passà la vatga unitara era ina politica sbagliada. Oz ins vesa uschia passa 30 razzas da muvel sin ils pastgs en il Grischun. En ils «Cuntrasts» da Radiotelevisiun Svizra Rumantscha mussain nus intginas da questas razzas e lur possessurs raquintan pertge ch'els han tschernì lur vatga preferida.