Allegra Svizra - Ils immigrants

Allegra Svizra (1/5) - novs munds

En l'emprima episoda mussain nus a Rahul Budhwar e sia dunna Megha ch'eran en l’India dus managers curunads da success. Els sa preparan sin la nova vita en ils conturns da Turitg. Lisa Maria Araujo banduna il Portugal, suenter ch'ella perda sia plazza da lavur. A Glion chatta ella ina nova sfida en il sectur da l'assistenza da persunas attempadas. La famiglia Al Sheikh è fugida da la guerra en la Siria. En il Tessin bajegia la famiglia si ina nova existenza lontan da la guerra. Per ils Franzos Julie Reynaud e Fabien Canovas cumenza a Neuchâtel ina nova fasa da la vita. Avant han els vivì gia plirs onns en Svezia.

Allegra Svizra (2/5) - Novas experienzas

Per ils Franzos ed amis da la natira Julie Reynaud e Fabien Canovas s'accumpleschan plirs siemis en questa segunda episoda. Uss pon els far spassegiadas en la natira pauc dalunsch da lur dachasa ed els sa maridan. La famiglia siriana Al Sheikh festiveschan per l'emprima giada il Ramadan en in nov conturn. Fadias han els cun il fatg che la figlia la pli veglia è anc adina sin la fugia. Lisa Maria Araujo tschertga contact cun ses cumpatriots durant il campiunadi europeic da ballape. Durant sias vacanzas turna ella en il Portugal tar sia famiglia. Rahul Budhwar sa prepara per vegnir en Svizra, sulet. En l’India festivescha el il cumià, è dentant era in pau malsegir.

Allegra Svizra (3/5) - Novs problems

Las nozzas en Frantscha dal Sid èn passadas, uss cloma il mintgadi svizzer. Julie Canovas è cuntenta cun sia lavur tar la Nestlé, ses um Fabien Canovas, in inschigner n'è betg satisfatg e tschertga ina nova sfida. La Portugaisa Lisa Maria Araujo è confruntada cun problems: Tar la mamma han ins diagnostitgà indizis d'ina demenza e la situaziun economica dals dus figls è preoccupanta. Il manager Rahul Budhwar è uss sez responsabel per ses tegnairchasa a Turitg, insatge ch'el n’ha mai fatg en l’India. El è cuntent che sia dunna e figlia arrivan prest en Svizra. Per las figlias Rawan e Razan da la famiglia siriana Al Sheikh cumenza ina nova aventura. Per l'emprima giada pon ellas frequentar in champ da classa.

Allegra Svizra (4/5) - Novas perspectivas

En questa quarta episoda arriva finalmain Megha Goyal cun la figlia Dia en Svizra, in grond di per ses um Rahul Budhwar. Mo la managera Megha ha bainprest dubis sch'ella è buna da viver a Turitg senza ina lavur. Dubis enconuscha era Lisa Maria Araujo. Turnada dal Portugal sa senta ella fitg solitaria en Surselva. Tut auter è quai tar Fabien Canovas. El s'è fatg independent ed è puspè cuntent. E sia dunna Julie è en speranza. Tar la famiglia Al Sheikh discurran las figlias Rawan e Razan currentamain talian. Uss vul era la mamma Abeer frequentar in curs da lingua.

Allegra Svizra (5/5) - Nova vita

En la davosa episoda vesain nus las difficultads da la famiglia Al Sheikh per s’integrar en lur nova patria. Contacts cun Svizzers èn difficils. Era en Svizra tutgan en emprima lingia cumpatriots da la Siria tar lur circul d'enconuschents. La portugaisa Lisa Maria Araujo ha bain chattà enconuschents en Svizra, dentant turnan sentiments da solitariadad adina puspè. Per fortuna vegn ses figl Eduardo a visitar ella questa stad. Il fravi d'art independent Fabien Canovas è cuntent cun sia situaziun professiunala, ma la gravidanza da sia dunna Julie fa gronds quitads. Megha Goyal è stratga vi e nà dapi ch'ella viva cun ses um Rahul Budhwar en Svizra. Restar a chasa procura per dubis murdents tar la managera. Per distracziun procura l’emprima aventura cun ils skis.